શિવ તાંડવ સ્તોત્ર

જટાટવીગલજ્જલપ્રવાહપાવિતસ્થલે ગલેઽવલંબ્ય લંબિતાં ભુજંગતુંગમાલિકામ્ ।
ડમડ્ડમડ્ડમડ્ડમન્નિનાદવડ્ડમર્વયં ચકાર ચંડતાંડવં તનોતુ નઃ શિવઃ શિવમ્ ॥૧॥

જટાકટાહસંભ્રમભ્રમન્નિલિંપનિર્ઝરીવિલોલવીચિવલ્લરીવિરાજમાનમૂર્દ્ધનિ ।
ધગદ્ધગદ્ધગજ્જ્વલલ્લલાટપટ્ટપાવકે કિશોરચંદ્રશેખરે રતિઃ પ્રતિક્ષણં મમ ॥૨॥

ધરાધરેંદ્રનંદિનીવિલાસબંધુબંધુરસ્ફુરદ્દિગંતસંતતિપ્રમોદમાનમાનસે ।
કૃપાકટાક્ષધોરણીનિરુદ્ધદુર્ધરાપદિ ક્વચિદ્દિગંબરે મનો વિનોદમેતુ વસ્તુનિ ॥૩॥

જટાભુજંગપિંગલસ્ફુરત્ફણામણિપ્રભાકદંબકુંકુમદ્રવપ્રલિપ્તદિગ્વધૂમુખે ।
મદાંધસિંધુરસ્ફુરત્ત્વગુત્તરીયમેદુરે મનો વિનોદમદ્ભુતં બિભર્તુ ભૂતભર્તરિ ॥૪॥

સહસ્રલોચનપ્રભૃત્યશેષલેખશેખરપ્રસૂનધૂલિધોરણીવિધૂસરાંઘ્રિપીઠભૂઃ ।
ભુજંગરાજમાલયા નિબદ્ધજાટજૂટકઃ શ્રિયૈ ચિરાય જાયતાં ચકોરબંધુશેખરઃ ॥૫॥

લલાટચત્વરજ્વલદ્ધનંજયસ્ફુલિંગભાનિપીતપંચસાયકં નમન્નિલિંપનાયકમ્ ।
સુધામયૂખલેખયા વિરાજમાનશેખરં મહાકપાલિ સંપદે શિરો જટાલમસ્તુ નઃ ॥૬॥

કરાલભાલપટ્ટિકાધગદ્ધગદ્ધગજ્જ્વલદ્ધનંજયાહુતીકૃતપ્રચંડપંચસાયકે ।
ધરાધરેંદ્રનંદિનીકુચાગ્રચિત્રપત્રકપ્રકલ્પનૈકશિલ્પિનિ ત્રિલોચને રતિર્મમ ॥૭॥

નવીનમેઘમંડલીનિરુદ્ધદુર્ધરસ્ફુરત્કુહૂનિશીથિનીતમઃપ્રબંધબદ્ધકંધરઃ ।
નિલિંપનિર્ઝરીધરસ્તનોતુ કૃત્તિસિંધુરઃ કલાનિધાનબંધુરઃ શ્રિયં જગદ્ધુરંધરઃ ॥૮॥

પ્રફુલ્લનીલપંકજપ્રપંચકાલિમપ્રભાઽવલંબિકંઠકંદલીરુચિપ્રબદ્ધકંધરમ્ ।
સ્મરચ્છિદં પુરચ્છિદં ભવચ્છિદં મખચ્છિદં ગજચ્છિદાંધકચ્છિદં તમંતકચ્છિદં ભજે ॥૯॥

અખર્વસર્વમંગલાકલાકદંબમંજરીરસપ્રવાહમાધુરીવિજૃંભણામધુવ્રતમ્ ।
સ્મરાંતકં પુરાંતકં ભવાંતકં મખાંતકં ગજાંતકાંધકાંતકં તમંતકાંતકં ભજે ॥૧૦॥

જયત્વદભ્રવિભ્રમભ્રમદ્ભુજંગમશ્વસદ્વિનિર્ગમત્ક્રમસ્ફુરત્કરાલભાલહવ્યવાટ્ ।
ધિમિદ્ધિમિદ્ધિમિદ્ધ્વનન્મૃદંગતુંગમંગલધ્વનિક્રમપ્રવર્તિતપ્રચંડતાંડવઃ શિવઃ ॥૧૧॥

દૃષદ્વિચિત્રતલ્પયોર્ભુજંગમૌક્તિકસ્રજોર્ગરિષ્ઠરત્નલોષ્ઠયોઃ સુહૃદ્વિપક્ષપક્ષયોઃ ।
તૃણારવિંદચક્ષુષોઃ પ્રજામહીમહેંદ્રયોઃ સમપ્રવૃત્તિકઃ કદા સદાશિવં ભજામ્યહમ્ ॥૧૨॥

કદા નિલિંપનિર્ઝરીનિકુંજકોટરે વસન્ વિમુક્તદુર્મતિઃ સદા શિરઃસ્થમંજલિં વહન્ ।
વિલોલલોલલોચનો લલામભાલલગ્નકઃ શિવેતિ મંત્રમુચ્ચરન્ કદા સુખી ભવામ્યહમ્ ॥૧૩॥

નિલિંપનાથનાગરીકદંબમૌલમલ્લિકાનિગુંફનિર્ભરક્ષરન્મધૂષ્ણિકામનોહરઃ ।
તનોતુ નો મનોમુદં વિનોદિનીમહર્નિશં પરશ્રિયઃ પરં પદં તદંગજત્વિષાં ચયઃ ॥૧૪॥

પ્રચંડવાડવાનલપ્રભાશુભપ્રચારણી મહાષ્ટસિદ્ધિકામિનીજનાઽવહૂતજલ્પના ।
વિમુક્તવામલોચનાવિવાહકાલિકધ્વનિઃ શિવેતિ મંત્રભૂષણા જગજ્જયાય જાયતામ્ ॥૧૫॥

ઇમં હિ નિત્યમેવમુક્તમુત્તમોત્તમં સ્તવં પઠન્સ્મરન્બ્રુવન્નરો વિશુદ્ધિમેતિ સંતતમ્ ।
હરે ગુરૌ સુભક્તિમાશુ યાતિ નાન્યથા ગતિં વિમોહનં હિ દેહિનાં સુશંકરસ્ય ચિંતનમ્ ॥૧૬॥

પૂજાવસાનસમયે દશવક્ત્રગીતં યઃ શંભુપૂજનપરં પઠતિ પ્રદોષે ।
તસ્ય સ્થિરાં રથગજેંદ્રતુરંગયુક્તાં લક્ષ્મીં સદૈવ સુમુખીં પ્રદદાતિ શંભુઃ ॥૧૭॥

॥ ઇતિ શ્રીરાવણકૃતં શિવતાંડવસ્તોત્રં સંપૂર્ણમ્ ॥