કાલભૈરવ અષ્ટકમ

દેવરાજસેવ્યમાનપાવનાંઘ્રિપંકજં વ્યાલયજ્ઞસૂત્રમિંદુશેખરં કૃપાકરમ્ ।
નારદાદિયોગિવૃંદવંદિતં દિગંબરં કાશિકાપુરાધિનાથકાલભૈરવં ભજે ॥૧॥

ભાનુકોટિભાસ્વરં ભવાબ્ધિતારકં પરં નીલકંઠમીપ્સિતાર્થદાયકં ત્રિલોચનમ્ ।
કાલકાલમંબુજાક્ષમક્ષશૂલમક્ષરં કાશિકાપુરાધિનાથકાલભૈરવં ભજે ॥૨॥

શૂલટંકપાશદંડપાણિમાદિકારણં શ્યામકાયમાદિદેવમક્ષરં નિરામયમ્ ।
ભીમવિક્રમં પ્રભું વિચિત્રતાંડવપ્રિયં કાશિકાપુરાધિનાથકાલભૈરવં ભજે ॥૩॥

ભુક્તિમુક્તિદાયકં પ્રશસ્તચારુવિગ્રહં ભક્તવત્સલં સ્થિતં સમસ્તલોકવિગ્રહમ્ ।
વિનિક્વણન્મનોજ્ઞહેમકિંકિણીલસત્કટિં કાશિકાપુરાધિનાથકાલભૈરવં ભજે ॥૪॥

ધર્મસેતુપાલકં ત્વધર્મમાર્ગનાશકં કર્મપાશમોચકં સુશર્મદાયકં વિભુમ્ ।
સ્વર્ણવર્ણશેષપાશશોભિતાંગમંડલં કાશિકાપુરાધિનાથકાલભૈરવં ભજે ॥૫॥

રત્નપાદુકાપ્રભાભિરામપાદયુગ્મકં નિત્યમદ્વિતીયમિષ્ટદૈવતં નિરંજનમ્ ।
મૃત્યુદર્પનાશનં કરાલદંષ્ટ્રમોક્ષણં કાશિકાપુરાધિનાથકાલભૈરવં ભજે ॥૬॥

અટ્ટહાસભિન્નપદ્મજાંડકોશસંતતિં દૃષ્ટિપાતનષ્ટપાપજાલમુગ્રશાસનમ્ ।
અષ્ટસિદ્ધિદાયકં કપાલમાલિકાધરં કાશિકાપુરાધિનાથકાલભૈરવં ભજે ॥૭॥

ભૂતસંઘનાયકં વિશાલકીર્તિદાયકં કાશિવાસલોકપુણ્યપાપશોધકં વિભુમ્ ।
નીતિમાર્ગકોવિદં પુરાતનં જગત્પતિં કાશિકાપુરાધિનાથકાલભૈરવં ભજે ॥૮॥

॥ ફલશ્રુતિઃ ॥
કાલભૈરવાષ્ટકં પઠંતિ યે મનોહરં જ્ઞાનમુક્તિસાધનં વિચિત્રપુણ્યવર્ધનમ્ ।
શોકમોહદૈન્યલોભકોપતાપનાશનં પ્રયાંતિ કાલભૈરવાંઘ્રિસન્નિધિં નરા ધ્રુવમ્ ॥૯॥

॥ ઇતિ શ્રીમચ્છંકરભગવતઃ કૃતૌ શ્રીકાલભૈરવાષ્ટકં સંપૂર્ણમ્ ॥